एक तट्टू जाळाच्या कड्यांतून उड्या मारून पडद्यात जात आहे तोच तंबूच्या डोलकाठीजवळ 'हूप' असा कानठळ्या बसविणारा आवाज प्रे़क्षकांनी ऐकला. सगळ्यांचे डोळे वर लागले. एक मोठा वानर---वानर कसला तो ! इतका मोठा का कधी वानर असतो ? मनुष्यच असला पाहिजे तो, वानराचे सोंग घेतलेला. इराण्णाच असावा तो - तंबूच्या डोलकाठीजवळून आत शिरून तो एका झोपाळ्यावर बसला. झोका घेत घेत त्याने ऐंशी फूट अंतरावरील समोरच्या झोपाळ्यावर उडी घेतली. शेपटीने झोपाळा पकडून झोके घेतले. इराण्णाने शेपटीची ही नवीन युक्ती शोधली असली पाहिजे असे मॅनेजरला वाटले. झोपाळ्यावरून पन्नास फूट खाली जमिनीवर आणि उलट खालून एकदम तंबूच्या अग्रापर्यंत अशा प्रचंड उड्या त्या वानराने घेतल्या. स्वतःच्या अंगाभोवती गिरक्या घेणे, शेपटीने जिन्नस उचलून घेणे, खांबावर सरसर चढणे व डोके खाली करून उतरणे अशी अतर्क्य कामे इराण्णाने करून दाखविली. ही शक्तीची आणि वेगाची कामे केल्यानंतर त्याने कांगारूप्रमाणे शेपटी जमिनीस टेकून सर्व अंग उचलून दाखविले. हे खेळ होत असता टाळ्यांचा प्रचंड गजर होत होता.सर्व बडे लोक खूष झाले. युरोपियन सर्कशीत देखील असा प्रकारचे काम आपण कधी पाहिले नाही असा निर्वाळा गव्हर्नरसाहेबांनी दिला.

-------------------------------------------------------------------------------------------------------------------
संकेत १: हा कथासंग्रह बहुतेकांना वाचलेला असावा.
संकेत २: हा एक विनोदी कथासंग्रह असून एका काल्पनिक गावातील कथांचे सुरस व चमत्कारीक वर्णन या संग्रहामध्ये आले आहे.
संकेत ३: या विनोदी लेखकाचा मानसपुत्र अतिशय लोकप्रिय असूनही हे पुस्तक मात्र त्या मानसपुत्रावर आधारीत नाही. तरी हे पुस्तक आजही तितकेच लोकप्रिय आहे.
संकेत ४: हे पुस्तक मुख्यतः लहान मुलांसाठी लिहीलेले असूनही मोठ्यांनाही निखळ विनोदाचा आनंद देते.
संकेत ५: एका गावातील खर्‍या अर्थाने जागृत असणार्‍या देवांच्या धमाल विनोदी कथा या संग्रहात आहेत.

वेच्याचे पहिले विजेते देवेंद्र प्रभुणे. पाठोपाठ सागरनेही लेखक व पुस्तक दोन्हीही ओळखले आहे. दोघांचेही अभिनंदन आता फक्त कथा ओळखा. अर्थात पुस्तक ओळखले हेच पुरेसे आहे.

पुस्तकः ओसाडवाडीचे देव
कथा: मानसशास्त्राचा चमत्कार
पान नं: ३४
लेखक: चिं. वि. जोशी