सध्या काय वाचताय? (भाग २) बराच मागे गेलाय. आणि मधल्या काळात सगळ्या मित्रांनी भरपूर खरेदीचे धागे टाकले. ( जळजळ दुसरे काय. ;)) त्यातले काय काय वाचून झाले हे जाणून घेण्यासाठी काढलेला हा धागा.

अशात ऑफिसमधे कामाचा व्याप वाढल्यामुळे वाचायला वेळ काढावा लागत आहे. तरी जसा वेळ मिळेल तसे काहीतरी वाचायचा प्रयत्न करत आहेच. मध्यंतरी अच्युत गोडबोले आणि अतुल कहाते यांनी लिहिलेले गुलाम हे पुस्तक हातात पडले. अच्युत गोडबोलेंच्या इतर पुस्तकात जसा एखाद्या विषयाचा आढावा घेतलेला असतो तसा याही पुस्तकात गुलामगिरीचा सविस्तर आढावा घेतलेला आहे. अगदी सुरवातीला गुलामगिरीच्या सुरूवातीपासून ते अगदी नव्वदीच्या दशकात दक्षिण आफ्रिकेत चालु असलेल्या गुलामगिरीचा इतिहासच मांडलेला आहे. पुस्तकाचा बराचसा भाग हा अमेरिकेतली वर्णद्वेषातून अभारलेल्या गुलामगिरीचा आणि त्या अनुषंगाने अमेरिकेचा इतिहासच सांगतो. एकुणच पुस्तक एकदा वाचावे असे नक्कीच आहे.