गडदेचा बहिरी ही ढाकच्या कड्यात असलेल्या बहिरीच्या गुहेत चालणार्‍या पशुहत्येविरुद्ध चाललेल्या संघर्षाची कहाणी.
राजमाची किल्ल्याच्या पायथ्याशी असलेल्या उढेवाडीतला खंडबा उंबरे कीर्तनाच्या ओढीने मळवलीतील एक जेष्ठ कीर्तनकार बुवांना कीर्तनासाठी उढेवाडीत आमंत्रण देतो. बुवा उढेवाडीत येउन कीर्तन करतात. राजमाचीचा राहाळ बघून बुवा हरिखतात. खंडबा बुवांना राजमाचीपासून पुढे असणार्‍या ढाक गडावर घेउन जातो. तिथे ढाकच्या हवालदाराकडे असलेले शिवाजी महारांजांचे अस्सल पत्र बुवा बघतात. त्यात ढाकच्या कड्यातील गुहेचा (गडदेचा) व त्यातील बहिरी देवाचा उल्लेख पाहून बुवांची गुहा बघण्याची इच्छा जागृत होते. कड्याच्या मध्यभागी एका अत्यंत अवघड जागच्या त्या गुहेत बुवा खंडबाच्या मदतीने पोहोचतात. बहिरीचे दर्शन घेतात तोच शेजारी त्यांना रक्ताळलेला धोंडा दिसतो. गुहेतील पाण्याच्या टाक्यांमध्ये असलेल्या साक्षात शिवाजी महराजांनी दिलेल्या भांड्याचा वापर आजूबाजूचे गांवकरी बहिरीला बळी देउन बरबटं शिजवण्यासाठी करतात हे पाहून बुवांचे मन विषण्ण होते व सुरुवात होते एका संघर्षाला.
राहाळाच्या परिसरात कीर्तन करून बुवा जनजागृती करतात. देवरुशाच्या पोटावरच पाय येतो. देवरुशाचा विरोध व बुवांच्या संघर्ष एका सामाजिक जाणिवेचा वेध घेतो. आजूबाजूचे गांवकरीही बुवांकडून सामील होतात. गडदेचा बहिरीला बारा मावळांतील पाण्याने अभिषेक करायचे ठरते. मुंबईहून मुकुंद गोंधळेकरांची मदत होते. अगदी काशीवरूनही जलकुंभ आणले जातात. देवरुशा हे उधळायचे ठरवतो. फणसराईतील नरशाला अनिष्टाची भिती दाखवून कोकरू बळी द्यायला प्रवृत्त करतो. इकडे बुवा गडदेतील धोंडा पवित्र जलकुंभांच्या अभिषेकाने धुवून काढतात. अशातच नरशा कोकरू घेउन मुलाणी व देवरुशासह गडदेत पोहोचतात. पुढे काय होते? प्रत्यक्ष पुस्तकच वाचा.
गोनीदांचे अत्यंत रसाळ शैलीतील हे पुस्तक आहे मात्र दुर्मिळ. आवृत्ती संपल्याने ते कुठेही मिळत नाही. अत्यंत साधी सरळ भाषा. राहाळाचे सुरेख वर्णन. गडदेचा बहिरी ही किती अवघड चीज आहे ते प्रत्यक्ष ढाकच्या गुहेत गेलेल्यांनाच कळेल. उभ्या कड्यातील गुहा. खाली २५०० फुटाचा सरळ तुटलेला कडा. गुहेत जायचे तेच मुळी पावलांएव्हढ्या खोबण्या चढून व पुढे वेलाचा आधार घेउन. अजूनही एव्हढी दुर्गम वाट चढून गांवकरी तिथे पाठीवर कोकरू, कोंबडं घेउन जातातच. एकापरीने बुवांचा संघर्ष अजूनही सुरुच आहे.